The Wall Street Journal: აშშ-ის სანქციების მიუხედავად, ჩინეთი რუსეთსა და ირანს დრონების კომპონენტებით ამარაგებს

ჩინეთის მცირე კომპანიები ღიად ამარაგებენ რუსეთსა და ირანს დრონების აწყობისთვის საჭირო კომპონენტებით - ძრავებით, ბატარეებით, ოპტიკურ-ბოჭკოვანი კაბელებით და ჩიპებით. ინფორმაციას The Wall Street Journal-ი ავრცელებს.

გამოცემის ცნობით, რუსეთისა და ირანის მომარაგება კომპონენტებით აშშ-ის სანქციების მიუხედავად ხდება.

კომპანია Xiamen Victory Technology გერმანიაში შექმნილი L550 ტიპის ძრავებითაც ამარაგებდა, რომლებსაც ირანულ Shahed-136 ტიპის დრონებზე აყენებდნენ, წერს გამოცემა.

ამერიკელი ჩინოვნიკების განცხადებით, ასეთი ვაჭრობის შეჩერება რთულია, რადგან უპილოტო საფრენი აპარატების ასაწყობად საჭიროა ისეთი ნაწილები, რომელთა გადაზიდვა და ექსპორტი მარტივად არის შესაძლებელი. ხშირ შემთხვევაში მიმწოდებლები არიან მცირე ჩინური კომპანიები, რომლებსაც ამერიკული სანქციები ნაკლებად აზიანებს და ისინი ღიად მუშაობენ.