The Wall Street Journal: ტრამპმა ჰეგსეტი პოლონეთში სამხედროების როტაციის შეჩერების გამო გააკრიტიკა

აშშ-ის პრეზიდენტმა დონალდ ტრამპმა თავდაცვის მდივანი პიტ ჰეგსეტი გააკრიტიკა მას შემდეგ, რაც გაიგო, რომ მან პოლონეთში ამერიკელი სამხედროების როტაცია შეაჩერა. ინფორმაციას The Wall Street Journal-ი ავრცელებს.

მოგვიანებით ტრამპმა თავის სოციალურ ქსელში დაწერა, რომ პოლონეთის პრეზიდენტთან კაროლ ნავროცკისთან ჩამოყალიბებული კარგი ურთიერთობების გამო შეერთებული შტატები პოლონეთში დამატებით 5 000 ამერიკელ სამხედროს გაგზავნის.

თავის პოსტში ტრამპს არ დაუკონკრეტებია, თუ რა სახის ჯარებს გააგზავნის პოლონეთში.

როგორც გამოცემა იუწყება, ტრამპი ჰეგსეტს ტელეფონით ესაუბრა და განუცხადა, რომ ვაშინგტონი, პოლონეთსა და თეთრ სახლს შორის არსებული თბილი ურთიერთობების გათვალისწინებით, ვარშავას ცუდად არ უნდა ექცეოდეს.

როგორც გამოცემას ყოფილი და მოქმედი ამერიკელი ჩინოვნიკები უყვებიან, ტრამპი დაინტერესდა, თუ რატომ შეაჩერა პენტაგონმა როტაცია, ხოლო მოგვიანებით დამატებით 5 000 ამერიკელი სამხედროს გაგზავნის შესახებ განცხადება გააკეთა.