ტრამპის განცხადებით, ირანთან პირდაპირ მოლაპარაკებებზე საუბარი ჯერ ძალიან ადრეა

აშშ-ის პრეზიდენტმა, დონალდ ტრამპმა გამოცემა New York Post-თან ინტერვიუში განაცხადა, რომ ირანთან პირდაპირ მოლაპარაკებებზე საუბარი ჯერ ძალიან ადრეა, მიუხედავად იმისა, რომ მედიაში გავრცელდა ინფორმაცია იმის შესახებ, რომ მხარეები სამშვიდობო შეთანხმების დადებას ძალიან მიუახლოვდნენ.

ჟურნალისტის კითხვაზე, უნდა მოემზადოს, თუ არა გამოცემა ისლამაბადში საკუთარი კორესპონდენტი გასაგზავნად, რომელიც სამშვიდობო შეთანხმების დადების პროცესს გააშუქებს, ტრამპმა განაცხადა: „არ მგონია“.

„ვფიქრობ, რომ ჩვენ ამას ვიზამთ - თუმცა ჯერ შორია“, - თქვა ტრამპმა. “ჯერ ძალიან ადრეა“.

როგორც გამოცემა აღნიშნავს, მანამდე ტრამპს უთქვამს, რომ ის არ იქნებოდა წინააღმდეგი ისლამაბადში ჩასულიყო და ოფიციალური შეთანხმებისთვის ხელი მოეწერა.

ცნობისთვის, გამოცემა AXIOS-მა დღეს გაავრცელა ინფორმაცია, რომ აშშ და ირანი ომის დასასრულებლად ერთგვერდიანი მემორანდუმის გაფორმებასთან ახლოს არიან.