ტრამპმა კუბას ახალი სანქციები დაუწესა

აშშ-ის პრეზიდენტმა, დონალდ ტრამპმა კუბის რეჟიმის წინააღმდეგ ამერიკული სანქციების გაფართოების შესახებ განკარგულებას მოაწერა ხელი. ინფორმაციას თეთრი სახლი ავრცელებს.

სანქციები მოიცავს აგენტებს, ხელისუფლების წევრებს ან კუბის მთავრობის მატერიალურ მხარდამჭერებს, რომლებიც ქვეყნის უსაფრთხოების ძალებს ეხმარებიან და მათ, ვინც სამთავრობო კორუფციაში და ადამიანის უფლებების სერიოზულ დარღვევებში არიან თანამონაწილეები.

ამასთან, ახალი სანქციები გლობალურ საბანკო სისტემაზე კუბის წვდომას შეზღუდავს და შეეხება ფიზიკურ, იურიდიულ პირებსა და ფინანსურ ინსტიტუტებს, რომლებიც კუბის რეჟიმთან კავშირების გამო აქამდე სანქცირებულებთან ფინანსურ ტრანზაქციებს ახორციელებენ.

განკარგულების მიხედვით, სანქციები, შესაძლოა, ეხებოდეს „ნებისმიერ უცხოელ პიროვნებას“, რომელიც მოქმედებს „კუბის ეკონომიკის, ენერგეტიკის, თავდაცვისა და მასთან დაკავშირებული მომარაგების, ლითონებისა და სამთო მრეწველობის, ფინანსური სერვისების, ან უსაფრთხოების სექტორში, ანდა კუბის ეკონომიკის ნებისმიერ სხვა სექტორში“.

განკარგულების ფარგლებში აშშ-ის მთავრობას შეუძლია სანქციები დაუწესოს უცხოურ ფინანსურ ინსტიტუტებსაც, რომლებსაც „განუხორციელებიათ ან ხელი შეუწყვიათ ნებისმიერი მნიშვნელოვანი ტრანზაქციისთვის“, მათ ვისაც კუბის მთავრობასთან კავშირები აქვს.