ტულსი გაბარდი ტრამპისადმი წერილში: სამწუხაროდ, იძულებული ვარ წარვადგინო ჩემი განცხადება გადადგომის შესახებ - ჩემს მეუღლეს ცოტა ხნის წინ ძვლის კიბოს უიშვიათესი ფორმის დიაგნოზი დაუსვეს, ამ ეტაპზე უნდა ჩამოვშორდე საჯარო სამსახურს, რათა ვიყო მის გვერდით და სრულად დავუჭირო მხარი ამ ბრძოლაში

აშშ-ის ეროვნული დაზვერვის დირექტორი, ტულსი გაბარდი თანამდებობას ტოვებს, რის შესახებაც პრეზიდენტს ოფიციალური წერილით უკვე აცნობა.

„ღრმად მადლობელი ვარ იმ ნდობისთვის, რომელიც ჩემ მიმართ გამოიჩინეთ და იმ შესაძლებლობისთვის, რომ ბოლო წელიწადნახევრის განმავლობაში ვხელმძღვანელობდი ეროვნული დაზვერვის დირექტორის ოფისს“, - აღნიშნავს გაბარდი მიმართვის დასაწყისში.

მისი გადაწყვეტილებით, გადადგომა ძალაში 2026 წლის 30 ივნისიდან შევა, რაც სრულიად პირად და მძიმე ოჯახურ მიზეზს უკავშირდება.

გაბარდი წერილში საზოგადოებას უზიარებს, რომ მის მეუღლეს, აბრაამს, ცოტა ხნის წინ ძვლის კიბოს უიშვიათესი ფორმის დიაგნოზი დაუსვეს, რის გამოც მას მომავალ კვირებსა და თვეებში უდიდესი გამოწვევების გადალახვა მოუწევს.

„სამწუხაროდ, იძულებული ვარ წარვადგინო ჩემი განცხადება გადადგომის შესახებ, რომელიც ძალაში 2026 წლის 30 ივნისიდან შევა. ჩემს მეუღლეს, აბრაამს, ცოტა ხნის წინ ძვლის კიბოს უიშვიათესი ფორმის დიაგნოზი დაუსვეს. მომავალ კვირებსა და თვეებში მას უდიდესი გამოწვევების გადალახვა მოუწევს. ამ ეტაპზე მე უნდა ჩამოვშორდე საჯარო სამსახურს, რათა ვიყო მის გვერდით და სრულად დავუჭირო მხარი ამ ბრძოლაში“, - აცხადებს დაზვერვის ხელმძღვანელი.

იგი იხსენებს მეუღლის თანადგომას მათი 11-წლიანი ქორწინების განმავლობაში, დაწყებული აღმოსავლეთ აფრიკაში ერთობლივი სპეციალური ოპერაციების მისიაში მისი დისლოკაციით, დასრულებული მრავალი პოლიტიკური კამპანიითა თუ ამჟამინდელი საპასუხისმგებლო პოსტით.

„მისი ძალა და სიყვარული მამხნევებდა ყოველი გამოწვევის დროს. მე არ შემიძლია სუფთა სინდისით ვთხოვო მას, რომ მარტო შეხვდეს ამ ბრძოლას, სანამ მე ამ მომთხოვნ და შრომატევად პოზიციაზე ვაგრძელებ მუშაობას“, - განმარტავს გაბარდი.

გაბარდი ხაზს უსვამს უწყების მიღწევებს და აღნიშნავს, რომ მათ „მნიშვნელოვან პროგრესს მიაღწიეს - წინ წაწიეს უპრეცედენტო გამჭვირვალობა და აღადგინეს მთლიანობა სადაზვერვო საზოგადოებაში“.

ამასთანავე, გაბარდი მზადყოფნას გამოთქვამს, მომავალი კვირების განმავლობაში უზრუნველყოს საქმეების საფუძვლიანი გადაბარება, რათა პრეზიდენტის გუნდმა არანაირი შეფერხება არ იგრძნოს.

წერილის დასასრულს ტულსი გაბარდი მადლობას უხდის პრეზიდენტს ამ რთულ პერიოდში გაგებისთვის: „სამუდამოდ მადლობელი დავრჩები თქვენი და ამერიკელი ხალხის წინაშე იმ უდიდესი პატივისთვის, რასაც ეროვნული დაზვერვის დირექტორის პოსტზე ჩვენი ქვეყნის სამსახურში ყოფნა ჰქვია“.

TWITTER POST