ზვიად შალამბერიძე სინოდის სხდომაზე: თითოეული ჩვენგანი თვალყურს ვადევნებთ ისტორიულ პროცესს, ვინაიდან ფაქტობრივად ბოლო 50 წლის განმავლობაში მსგავსი არჩევნები არ ჩატარებულა

თითოეული ჩვენგანი თვალყურს ვადევნებთ ისტორიულ პროცესს, ვინაიდან ფაქტობრივად ბოლო 50 წლის განმავლობაში მსგავსი არჩევნები არ ჩატარებულა, - განაცხადა გადაცემაში „დღის ქრონიკა“ რეგიონული პოლიტიკისა და თვითმმართველობის საპარლამენტო კომიტეტის თავმჯდომარის პირველმა მოადგილემ ზვიად შალამბერიძემ საპატრიარქოში გამართულ სინოდის დღევანდელ სხდომაზე.

შალამბერიძის თქმით, მიესალმება, რომ მიუხედავად გარკვეული ძალების მხრიდან მცდელობისა, შიდა დაპირისპირება გაეღვივებინათ საპატრიარქოში, დღეს სინოდის სხდომა ძალიან მშვიდ ვითარებაში ჩატარდა.

„ერთადერთი ამ შემთხვევაში რაც შემიძლია ვთქვა, თითოეული ჩვენგანი თვალყურს ვადევნებთ ისტორიულ პროცესს, ვინაიდან ფაქტობრივად ბოლო 50 წლის განმავლობაში მსგავსი არჩევნები არ ჩატარებულა. სინოდს არ აურჩევია პატრიარქი მას შემდეგ, რაც ჩვენი უწმინდესი იყო არჩეული. ეს არის პირველი, რასაც ცოცხლად ვადევნებთ თვალყურს. მივესალმები იმას, რომ მიუხედავად მთელი იმ ემოციებისა, თავდასხმებისა, რასაც ჩვენ მთელი ამ 40 დღის განმავლობაში ვისმენდით და მიუხედავად იმისა, რომ არაერთი მცდელობა იყო გარკვეული ძალების მხრიდან, რაღაცნაირად აერიათ ეს პროცესი, შიდა დაპირისპირება გაეღვივებინათ საპატრიარქოში, დღეს ძალიან მშვიდ ვითარებაში ჩატარდა სინოდის სხდომა.

დარწმუნებული ვარ, შემდგომი სხდომებიც რაც უნდა ჩატარდეს, სადაც საბოლოოდ უნდა მიიღონ გადაწყვეტილება სინოდის წევრებმა, ასეთივე მშვიდ ვითარებაში ჩაივლის და საბოლოო გადაწყვეტილებას ერთად ვნახავთ ჩვენს საზოგადოებასთან ერთად.

ფაქტია, გარკვეული ძალებიც, ადამიანებიც, არასამთავრობო ორგანიზაციები თუ ოპოზიციის წარმომადგენლებიც, დღევანდელ დღეს, დარწმუნებული ვარ, ისინიც ძალიან ყურადღებით ადევნებდნენ თვალყურს. ძალიან დიდი იმედი ჰქონდათ, რომ რაიმე დაპირისპირება შესაძლოა ყოფილიყო დღეს სინოდის სხდომაზე, მაგრამ როგორც ძალიან ბევრ პროცესში ეს ადამიანები გააწბილა ქართულმა საზოგადოებამ, ისეთივე გაწბილებულები იქნებიან დღეს სინოდის სხდომის შემდეგ“, - აღნიშნა ზვიად შალამბერიძემ.

პატრიარქობის სამი კანდიდატი ცნობილია - მეუფე შიო 20 ხმა, მეუფეები იობი და გრიგოლი - 7-7 ხმა