ამერიკულმა მედიასაშუალებებმა დონალდ ტრამპის ადმინისტრაციას სასამართლოში უჩივლეს

CNN-მა, MS NOW-მ და Politico-მ დონალდ ტრამპის ადმინისტრაციის წინააღმდეგ სასამართლოში სარჩელი შეიტანეს. მედიაკომპანიებმა სამართლებრივ დავას თეთრ სახლში ჟურნალისტებისთვის საშვების გაუფრთხილებლად გაუქმების გამო მიმართეს.

ამ ნაბიჯით გამოცემები მიზნად აშშ-ის კონსტიტუციის პირველი შესწორებით გარანტირებული უფლებებისა და პრესის თავისუფლების დაცვასა და კუთვნილი პოზიციების აღდგენას ისახავენ. მოსარჩელეების განმარტებით, პრეზიდენტს ან ნებისმიერ სხვა თანამდებობის პირს არ აქვს უფლება, მედიას აკრედიტაცია მხოლოდ იმიტომ ჩამოართვას, რომ გაშუქების შინაარსი შეთანხმებული არ იყო. არხების წარმომადგენლები მიიჩნევენ, რომ ამგვარი ქმედება ხელისუფლების ჩარევისგან დამოუკიდებელი ჟურნალისტიკის არსებობას საფრთხეს უქმნის.

მნიშვნელოვანია ითქვას, რომ გადაწყვეტილებას წინ დონალდ ტრამპის მხრიდან მედიასაშუალებების მიმართ გამოთქმული მწვავე ბრალდებები უძღოდა. აშშ-ის პრეზიდენტმა დასახელებული გამოცემები ადმინისტრაციის საქმიანობის გაშუქებისას სიცრუის ტირაჟირებაში დაადანაშაულა. სოციალურ ქსელში გამოქვეყნებულ განცხადებაში დონალდ ტრამპმა ხაზგასმით თქვა, რომ თეთრი სახლი თავისუფალ პრესას არ უპირისპირდება. პრეზიდენტის თქმით, ეს ნაბიჯი მხოლოდ "კიბოს მსგავსად გაზრდილი ყალბი ამბების" წინააღმდეგ მიმართული იერიშია.

აღსანიშნი ფაქტია, რომ თეთრი სახლის სატელევიზიო კლუბის წევრმა მედიებმა CNN-ის შეზღუდვის გამო მუშაობა პროტესტის ნიშნად შეაჩერეს. ცნობისთვის, ამ ჯგუფში ABC, CBS-ი, NBC და Fox News-ი შედიან.

ეს ტელეკომპანიები პრეზიდენტის საქმიანობის გაშუქების ხარჯებს ინაწილებენ და გადაღებულ მასალას ქვეყნის მასშტაბით სხვა არხებს უზიარებენ. Fox News-ის ვაშინგტონის ბიუროს ხელმძღვანელმა, ბრაიან ბოუტონმა კოლეგებს წერილით აცნობა, რომ ადმინისტრაციის პოზიციის გამო CNN-ის ჩამნაცვლებელი ჯგუფი აღარ იმუშავებს.

მოვლენათა ამგვარი განვითარების შედეგად დონალდ ტრამპის გაეროს გენერალურ ასამბლეაზე ვიზიტის საპროგრამო ვიდეოგადაღება ჩაიშალა. ტელეკომპანიებმა ერთობლივ განცხადებაში აღნიშნეს, რომ საზოგადოებას მთავრობის საქმიანობის შესახებ მიუკერძოებელი ინფორმაციის მიღების უფლება აქვს. მედიასაშუალებების შეფასებით, არცერთ ადმინისტრაციას არ შეუძლია პრესის მუშაობა მხოლოდ გაშუქების მიუღებლობის გამო შეზღუდოს.

ცნობისთვის, დონალდ ტრამპსა და ამერიკულ მედიასაშუალებებს შორის დაპირისპირება წლებია გრძელდება. ჯერ კიდევ 2017 წელს, პირველი საპრეზიდენტო ვადის დაწყებისას, მან პრესას "ამერიკელი ხალხის მტერი" უწოდა.