კანადასთან სავაჭრო ომის ფონზე, ტრამპი ბელარუსთან სასუქების "მასშტაბური" გარიგების დადებას აპირებს

აშშ-ის პრეზიდენტმა დონალდ ტრამპმა განაცხადა, რომ ბელარუსისგან სასუქის შესასყიდად "მასშტაბურ" გარიგებაზე მუშაობს. ეს ნაბიჯი კანადასთან მზარდი სავაჭრო დავის ფონზე მთავარ მომწოდებელზე უარის თქმასა და რუსეთის მოკავშირეზე გადართვას გულისხმობს.

"შეერთებული შტატები ბელარუსისგან კალიუმის მარილის შესყიდვის მასშტაბურ გარიგებაზე მუშაობს. ფასი საგრძნობლად დაბალი იქნება, ვიდრე ახლა კანადას ვუხდით, რაც ძალიან კარგი სიახლეა ჩვენი ფერმერებისა და მესაქონლეებისთვის", - დაწერა ტრამპმა სოციალურ ქსელ Truth Social-ში.

ბოლო კვირებში ტრამპმა კანადასთან სავაჭრო ომი გააძლიერა - აშშ-ის გრძელვადიან მოკავშირესთან და ქვეყნისთვის კალიუმის უმსხვილეს მომწოდებელთან.

ეს განცხადება მიუთითებს ვაშინგტონის მზადყოფნაზე, აწარმოოს დიალოგი მინსკთან, მიუხედავად დისიდენტების რეპრესიებისა და უკრაინაში რუსეთის შეჭრის მხარდაჭერისა.

აშშ-ს კალიუმის მარილის - ქიმიური ნივთიერების, რომელიც სასუქების წარმოებაში გამოიყენება - უდიდესი ნაწილი იმპორტით შემოაქვს. 2022 წელს უკრაინაში ომის დაწყების შემდეგ მასზე ფასები მკვეთრად გაიზარდა.

აშშ-ის გეოლოგიური სამსახურის (USGS) მონაცემებით, 2024 წელს იმპორტის 79% კანადაზე მოდიოდა, 11% - რუსეთზე, ხოლო 4% - ბელარუსზე.

ტრამპის მეორე ადმინისტრაციის პირობებში ვაშინგტონმა ბელარუსთან ურთიერთობების დათბობა ფარულად დაიწყო. გასულ კვირას ბელარუსმა 25 პოლიტპატიმარი გაათავისუფლა, რის საპასუხოდაც აშშ-მა ქვეყნის ორ კომპანიას სანქციები მოუხსნა.

დასავლეთის ქვეყნებმა ბელარუსს სანქციები 2022 წელსაც გაუმკაცრეს, როდესაც მინსკმა მოსკოვს საკუთარი ტერიტორიიდან უკრაინაში შეჭრის საშუალება მისცა.

ბელარუსის ემიგრაციაში მყოფმა ოპოზიციის ლიდერმა სვეტლანა ტიხანოვსკაიამ ორშაბათს განაცხადა, რომ ლუკაშენკოსთან ნებისმიერი შეთანხმება "ძალიან სარისკოა".

"ჩვენი პოზიციაა, რომ რეჟიმთან ვაჭრობის დრო არ არის, როდესაც კალიუმიდან მიღებული მთელი შემოსავალი რეპრესიებსა და რუსული სამხედრო მანქანის მხარდაჭერას ხმარდება", - განუცხადა ტიხანოვსკაიამ სააგენტო AFP-ს.