პირველად პროექტთან შედარებით, 2027 წელს განათლების სამინისტროს დაფინანსება ₾73 მლნ ლარით იზრდება

განათლების, მეცნიერებისა და ახალგაზრდობის სამინისტროს დაფინანსება 298,9 მლნ ლარით 3 მილიარდ 001 მილიონ ლარამდე იზრდება. აღსანიშნავია, რომ 2027 წლის ბიუჯეტის პროექტის პირველად ვარიანტთან შედარებით უწყება დაფინანსება გაზრდილი 73,1 მლნ ლარით.

სამინისტროს ფარგლებში გათვალისწინებულია:

• სკოლამდელი და ზოგადი განათლება - 2 099,2 მლნ ლარი, რაც პროექტის პირველად ვერსიას 16,3 მლნ ლარით აღემატება. პროგრამის ფარგლებში გათვალისწინებულია საჯარო სკოლების მასწავლებლებისა და ადმინისტრაციული პერსონალის ხელფასების ზრდა. გარდა ამისა, მომდევნო წლის სექტემბრიდან გათვალისწინებულია სადამრიგებლო დანამატის გაორმაგება; • პროფესიული განათლება - 263 მლნ ლარი (პროექტის პირველად ვარიანტთან შედარებით გაზრდილია 15 მლნ ლარით); • უმაღლესი განათლება - 266,7 მლნ ლარი (პროექტის პირველად ვარიანტთან შედარებით გაზრდილია 19 მლნ ლარით). პროგრამის ფარგლებში 105 მლნ ლარია გათვალისწინებული უმაღლესი განათლების რეფორმის დასაფინანსებლად, რომლის ფარგლებშიც სახელმწიფო უნივერსიტეტებში 2026 წლიდან მიღებული სტუდენტების სწავლა სრულად ფინანსდება სახელმწიფო ბიუჯეტიდან; • მეცნიერებისა და სამეცნიერო კვლევების ხელშეწყობა - 97,3 მლნ ლარი; • ინკლუზიური განათლება - 138,4 მლნ ლარი, რომლის ფარგლებშიც გათვალისწინებულია შესაბამისი უნარების მქონე მასწავლებლების რაოდენობის და მათი ხელფასების ზრდა (პროექტის პირველად ვარიანტთან შედარებით გაზრდილია 11 მლნ ლარით); • ახალგაზრდობის მხარდაჭერა - 26,5 მლნ ლარი (პროექტის პირველად ვარიანტთან შედარებით გაზრდილია 4 მლნ ლარით).

"განათლების სამინისტროს მიმართულებით ბიუჯეტის ზრდა 73 მილიონ ლარს შეადგენს და ჯამში 3 მილიარდ ლარს გადააჭარბებს. მათ შორის სკოლამდელი და ზოგადი განათლების ნაწილში ზრდა 16 მილიონი ლარია. ამ თანხის ძირითადი ნაწილი დაახლოებით 9 მილიონი ლარი ე.წ. სადამრიგებლო დანამატის გაზრდას მოხმარდება. კერძოდ, სექტემბრიდან დაგეგმილია დანამატის გაორმაგება და 100 ლარის ნაცვლად მისი მოცულობა 200 ლარი გახდება.

პროფესიულ განათლებაში სტუდენტების რაოდენობისა და სასწავლო მოდულების ზრდიდან გამომდინარე, 15 მილიონი ლარი ემატება. უმაღლეს განათლებაში დამატებულია 9 მილიონი ლარი. უფასო სწავლების ნაწილში თანხა განათლების სამინისტროს იმ პროგნოზის მიხედვითაა დათვლილი, თუ რამდენი ახალი სტუდენტი ეყოლებათ მომდევნო წელს. ინკლუზიურ განათლებაში გათვალისწინებულია 11 მილიონი ლარის დამატება, რაც ძირითადად სპეციალური საჭიროების მქონე ბავშვების ასისტენტების რაოდენობის ზრდასა და მათი ხელფასების მატებას მოხმარდება", - განაცხადა ფინანსთა მინისტრის მოადგილემ გიორგი კაკაურიძემ.