PrivatBank-მა ბრიტანეთის უზენაეს სასამართლოში კოლომოისკისა და ბოგოლიუბოვთან $3 მილიარდის დავა მოიგო

დიდი ბრიტანეთის უზენაესმა სასამართლომ PrivatBank-ის ყოფილი მფლობელების, ოლიგარქ იგორ კოლომოისკისა და გენადი ბოგოლიუბოვის საბოლოო სააპელაციო საჩივარი არ დააკმაყოფილა.

ამ გადაწყვეტილებით $3 მილიარდზე მეტი ოდენობის თაღლითობის საქმეზე სააპელაციო პროცესი საბოლოოდ დასრულდა. შედეგად, უკრაინის უმსხვილეს სახელმწიფო ბანკს მთელ მსოფლიოში თანხების იძულებითი ამოღების სამართლებრივი გზა გაეხსნა.

შეგახსენებთ, 2025 წლის ივლისში ლონდონის სასამართლომ კოლომოისკი და ბოგოლიუბოვი თაღლითობაში დამნაშავედ ცნო, ნოემბერში კი მათ $3 მილიარდზე მეტის გადახდა დააკისრა. ყოფილმა მფლობელებმა თანხა დადგენილ ვადაში არ გადაიხადეს და განაჩენი გაასაჩივრეს.

აღსანიშნავია, რომ სააპელაციო სასამართლომ მათი მოთხოვნა 2026 წლის მაისშიც უარყო. PrivatBank-ის შეფასებით, უზენაესი სასამართლოს განჩინება ინსტიტუტს აქტივების ამოღების პროცესის მსოფლიოს ნებისმიერ იურისდიქციაში გაგრძელების საშუალებას მისცემს.

მნიშვნელოვანია ითქვას, რომ სასამართლო დავის ფარგლებში, ყოფილი აქციონერების $2.5 მილიარდის აქტივები საერთაშორისო მასშტაბით უკვე დაყადაღებულია. Kyiv Independent-ის ინფორმაციით, ბანკის სამომავლო სტრატეგია სწორედ ამ გაყინული რესურსების ამოღებას დაეფუძნება.

შეგახსენებთ, უკრაინის ცენტრალურმა ბანკმა PrivatBank-ის ნაციონალიზაცია 2016 წელს განახორციელა, როდესაც ფინანსურ ინსტიტუტში თაღლითური სქემების გამო $5.5 მილიარდის დეფიციტი გამოვლინდა.