პუტინმა რუსეთის მთავრობაში მასშტაბური საკადრო ცვლილებები დაამტკიცა

რუსეთის პრეზიდენტმა, ვლადიმერ პუტინმა მთავრობაში მასშტაბური საკადრო ცვლილებები დაამტკიცა. როგორც ირკვევა, ახალი გადანაწილების ფარგლებში პრემიერ-მინისტრ მიხეილ მიშუსტინის მოადგილეების თითქმის ნახევარი შეიცვლება.

მნიშვნელოვანია ითქვას, რომ ფინანსთა მინისტრი ანტონ სილუანოვი დამატებით ვიცე-პრემიერის პოსტსაც დაიკავებს. ამასთან ერთად, მიშუსტინის მთავრობის აპარატის ხელმძღვანელის თანამდებობაზე ფინანსთა მინისტრის პირველი მოადგილე, ირინა ოკლადნიკოვა დაინიშნება. აღსანიშნავია, რომ ის უწყების ისტორიაში პირველი ქალი ხელმძღვანელი იქნება.

რაც შეეხება სხვა ცვლილებებს, ტრანსპორტის მინისტრი ანდრეი ნიკიტინი ვიცე-პრემიერი გახდება. ნიკიტინი პოსტზე შეცვლის ვიტალი საველიევს, რომელმაც თანამდებობა სახელმწიფო დუმაში არჩევის შემდეგ დატოვა. პარალელურად, რუსეთის სამოქალაქო ავიაციის სააგენტოს ხელმძღვანელი, დიმიტრი იადროვი ტრანსპორტის მინისტრი გახდება.

ამას გარდა, პრიმორიეს მხარის გუბერნატორი ოლეგ კოჟემიაკო შორეული აღმოსავლეთის ფედერალურ ოლქში პრეზიდენტის წარმომადგენლად და ვიცე-პრემიერად დაინიშნება.

გამოცემა The Moscow Times-ის ინფორმაციით, რუსეთის პრეზიდენტმა მთავრობა იმ მიზნით გადაახალისა, რომ გააძლიეროს ფისკალური მმართველობა და მზარდი ბიუჯეტის დეფიციტის, გაზრდილი გადასახადებისა და მაღალი საპროცენტო განაკვეთების ფონზე მოიძიოს ეკონომიკური ზრდის ახალი წყაროები.