რა ფაქტორების გამო გამოეთიშა CCCC პროცესს?|რა უპასუხეს "რადიო თავისუფლებას" ჩინეთის საელჩოში ანაკლიის პორტზე?

"პატივს ვცემთ და გვესმის საქართველოს გადაწყვეტილება ამ საკითხთან დაკავშირებით" - ასე უპასუხეს "რადიო თავისუფლების" მიერ საქართველოში ჩინეთის საელჩოსთვის გაგზავნილ კითხვებს, რომელიც ანაკლიის პორტის პროექტიდან ჩინურ-სინგაპურული კორპორაციის ჩამოშორებას შეეხებოდა.

2024 წელს ტენდერში გამარჯვებულად გამოცხადდა ჩინურ-სინგაპურული კონსორციუმი, რომელშიც შედიოდნენ სახელმწიფო კომპანია China Communications Construction Company (CCCC) და მისი შვილობილი, სინგაპურში დარეგისტრირებული China Harbour Investment Pte. Ltd. ორი წლის თავზე გაირკვა, რომ პორტს ისინი აღარ ააშენებენ და ვეღარც 49%-ს ვერ მიიღებენ.

"რადიო თავისუფლება" წერს, რომ CCCC-ში გაგზავნილი შეკითხვები უპასუხოდ დარჩა; თუმცა ჩინეთის საელჩომ საქართველოში მათ შეკითხვებს უპასუხა. გამოცემამ დიპლომატიურ წარმომადგენლობას შემდეგი კითხვებით მიმართა:

• რატომ, რა ფაქტორების გამო გამოეთიშა CCCC ამ პროცესს? • ეს კონსორციუმის გადაწყვეტილება იყო, თუ საქართველოს მთავრობის?

ჩინეთის საელჩოდან მიღებულ პასუხს პრესმდივანი აწერს ხელს: „პატივს ვცემთ და გვესმის საქართველოს გადაწყვეტილება ამ საკითხთან დაკავშირებით. ჩინური კომპანია, რომელიც მანამდე მონაწილეობდა ამ პროექტის ტენდერში, მკაცრად იცავდა საქართველოს კანონმდებლობასა და რეგულაციებს, ისევე როგორც საერთაშორისო კომერციულ წესებს და ინარჩუნებდა მჭიდრო კომუნიკაციასა და კოორდინაციას საქართველოს შესაბამის უწყებებთან პროექტთან დაკავშირებულ საკითხებზე. საქართველოს მთავრობამ გამოაცხადა, რომ ის ხელახლა გამოაცხადებს ტენდერს ანაკლიის პორტის პროექტზე - „მშენებლობისა“ და „ოპერირების“ კომპონენტებად დაყოფით”.

ტექსტის თანახმად, საელჩო იმედოვნებს, რომ თბილისის გადაწყვეტილება „მონაწილეობის მისაღებად მოიზიდავს პორტების მშენებლობისა და ოპერირების უფრო მეტ კომპანიას, მთელი მსოფლიოდან” და ჩინეთი კვლავ იაქტიურებს:

“ჩინეთი კვლავაც წაახალისებს ჩინურ საწარმოებს ანაკლიის პორტის პროექტში მონაწილეობის მისაღებად, საბაზრო პრინციპებზე დაყრდნობით. ვისურვებდით ანაკლიის პორტის პროექტის ადრეულ დასრულებას, რათა მან უფრო მნიშვნელოვანი როლი შეასრულოს „შუა დერეფნის“ საერთო კონკურენტუნარიანობის ამაღლებაში და წვლილი შეიტანოს ევრაზიის რეგიონში წარმოებისა და მიწოდების ჯაჭვების სტაბილურობაში”.ცნობისთვის, დღეს ირაკლი კობახიძემ განაცხადა, რომ ანაკლიის პორტის მიმართ ინტერესი ფართოა და საქართველოს ხელისუფლება ყველა დაინტერესებულ მხარესთან სასაუბროდ მზად არის.