რუსეთი უკრაინის ენერგოობიექტებზე მასშტაბური იერიშებით იმუქრება

რუსეთი უკრაინის ენერგეტიკულ ინფრასტრუქტურაზე მასშტაბური დარტყმების განხორციელებით იმუქრება. რუსეთის თავდაცვის სამინისტროს განცხადებით, ასეთი იერიშები უკრაინის მხრიდან რუსულ ენერგოობიექტებსა და სამოქალაქო ინფრასტრუქტურაზე განხორციელებულ თავდასხმებზე პასუხი იქნება.

აღსანიშნავია, რომ რუსეთის განცხადება უკრაინის კიევის რეგიონში მდებარე დასახლებაში, მილის რაიონში, საბრძოლო მასალების საწყობზე განხორციელებულ თავდასხმას მოჰყვა. უკრაინის პრეზიდენტის, ვოლოდიმირ ზელენსკის განცხადებით, 29 აგვისტოს მომხდარი თავდასხმის შედეგად დაღუპულთა რაოდენობამ 38-ს მიაღწია. კიდევ 20 ადამიანი დაშავდა, ოთხი კი ამ დრომდე დაკარგულად ითვლება.

უკრაინის ხელისუფლების ინფორმაციით, აფეთქების შედეგად ადგილზე ხანძარი გაჩნდა. საგანგებო სამსახურები მუშაობენ ტერიტორიის გასაწმენდად, რადგან ადგილზე კვლავ რჩება საბრძოლო მასალები და არსებობს ახალი აფეთქებების საფრთხე.

ზელენსკის განცხადებით, გასულ კვირაში რუსეთმა უკრაინის წინააღმდეგ დაახლოებით 2 000 დრონი, 1 600-ზე მეტი საავიაციო ბომბი და 31 რაკეტა გამოიყენა. უკრაინის პრეზიდენტის თქმით, შეტევების ნაწილი ჩრდილოეთ კორეის წარმოების ბალისტიკური რაკეტებითაც განხორციელდა.

რუსეთის თავდაცვის სამინისტრომ კი განაცხადა, რომ უკრაინის ენერგეტიკულ ობიექტებზე შესაძლო მასშტაბური დარტყმები ბოლო პერიოდში რუსეთის ტერიტორიაზე განხორციელებულ თავდასხმებზე საპასუხო ნაბიჯი იქნება.

ბოლო დღეებში ორივე მხარის მიერ ენერგეტიკულ და სამხედრო ინფრასტრუქტურაზე თავდასხმები გააქტიურდა, რაც უკრაინაში ზამთრის მოახლოებასთან ერთად ენერგომომარაგების უსაფრთხოებას დამატებით მნიშვნელობას სძენს.