თბილისის საკრებულოსთან 10 აქტივისტი ბანერების გამო დააკავეს
თბილისის საკრებულოსთან 10 აქტივისტი ბანერების გამო დააკავეს. ისინი დღეს საღამოს დაკავებული აქტივისტის თორნიკე თოშხუას სოლიდარობისთვის იყვნენ შეკრებილები. ცნობისთვის, თოშხუაც საპროტესტო ბანერის გამო დააკავეს.
დაკავებების შესახებ შსს განცხადებას ავრცელებს:
„შინაგან საქმეთა სამინისტროს საპატრულო პოლიციის თანამშრომლებმა თბილისის საკრებულოს მიმდებარე ტერიტორიაზე დააკავეს 10 პირი, რომლებსაც საჯარო სივრცეში შეურაცხმყოფელი ბანერები ეჭირათ. გარდა ამისა, ისინი გამოთქვამდნენ შეურაცხმყოფელ ფრაზებს, არღვევდნენ საზოგადოებრივ წესრიგს და წინააღმდეგობას უწევდნენ სამართალდამცველებს. პოლიციელებმა აღნიშნული პირები ადმინისტრაციულ სამართალდარღვევათა კოდექსის 166-ე და 173-ე მუხლებით დააკავეს“, - ნათქვამია უწყების განცხადებაში.
მომხდარს გამოეხმაურა საია, რომელიც აცხადებს, რომ შსს-მ დაუყოვნებლივ უნდა გაათავისუფლოს გამოხატვის და შეკრების უფლებით სარგებლობისთვის დაკავებული პირები და შეწყვიტოს მშვიდობიანი დემონსტრანტების უკანონო დევნა.
"აქციების ამგვარი ფორმით დაშლა არა მხოლოდ უკანონობა, არამედ, სისხლის სამართლის კოდექსით გათვლიაწინებული დანაშაულია - შეკრების ან მანიფესტაციის მოწყობის ანდა მასში მონაწილეობის უფლების განხორციელებისათვის უკანონოდ ხელის შეშლა (სსკ მუხლი 161)", - აცხადებენ საიაში.
BM.GE
წყარო: bm.ge