ზელენსკი უკრაინის პრემიერს ცვლის - "სამთავრობო ცვლილებებს განვახორციელებთ"

უკრაინის პრეზიდენტმა ვოლოდიმირ ზელენსკიმ განაცხადა, რომ პრემიერ-მინისტრ იულია სვირიდენკოს შეცვლის. როგორც ის აცხადებს, მან სვირიდენკოს შეცვლის წინადადება უკვე წარადგინა. ზელენსკიმ არ დააკონკრეტა სვირიდენკოს ახალი თანამდებობა ან მისი მემკვიდრის სახელი, თუმცა დასძინა, რომ ცვლილებები ასევე იქნება სამართალდამცავი ორგანოების ხელმძღვანელებში.

„მადლობელი ვარ იულიასთვის პრემიერ-მინისტრის თანამდებობაზე მისი მკაფიო, სტაბილური და ეფექტური მუშაობისთვის, უკრაინის გუნდში მრავალწლიანი პროდუქტიული სამსახურისთვის და შევთავაზე მას შესაძლებლობა, უხელმძღვანელოს ურთიერთობების ახალ და მნიშვნელოვან სფეროს მთავარ პარტნიორთან“, - დაწერა ზელენსკიმ X-ზე.

„მე ველოდები, რომ პარლამენტის წევრებთან ერთად უკრაინის მთავრობაში შესაბამის ცვლილებებს განვახორციელებთ“, - დასძინა მან.

ზელენსკის განცხადებით, მთავრობაში ცვლილებები საჭიროა „განახლებული პოლიტიკური სტრატეგიის განხორციელების უზრუნველსაყოფად“, მაგრამ დამატებითი დეტალები არ დაუკონკრეტებია.

ცნობისთვის, სვირიდენკო პრემიერად ერთი წლის წინ - 2025 წლის ივლისში დაინიშნა.

ოპოზიციონერმა დეპუტატმა იაროსლავ ჟელეზნიაკმა განაცხადა, რომ სვირიდენკო, სავარაუდოდ, შეერთებულ შტატებში ელჩის თანამდებობას დაიკავებს. „ეს ნიშნავს, რომ ის პრემიერ-მინისტრის თანამდებობას დატოვებს და მთელი მთავრობა გადაიხედება“, - განაცხადა ჟელეზნიაკმა Telegram-ზე.

აღსანიშნავია, რომ უკრაინის კანონმდებლობის თანახმად, პრემიერ-მინისტრის გადადგომას პარლამენტის დამტკიცება სჭირდება და მთელი მთავრობის გადადგომას გულისხმობს.

REUTERS-ის ცნობით, უკრაინელი კანონმდებლები აცხადებენ, რომ სვირიდენკოს შესაძლო მემკვიდრეებს შორის არიან მისი წინამორბედი, ენერგეტიკის მინისტრი დენის შმიგალი; თავდაცვის მინისტრი მიხაილ ფედოროვი; და სახელმწიფო ენერგეტიკული კომპანია „ნაფტოგაზის“ ხელმძღვანელი სერგეი კორეცკი.