ზუგდიდში 1000 მაყურებელზე გათვლილი მრავალფუნქციური სპორტული კომპლექსის პროექტირება იწყება - რა იქნება პროექტის ღირებულება?

ზუგდიდში 1000 მაყურებელზე გათვლილი მრავალფუნქციური სპორტული კომპლექსის პროექტირება იწყება.

ინფრასტრუქტურის სამინისტროს მუნიციპალური განვითარების ფონდმა შესაბამისი ხელშეკრულება კონკურსში გამარჯვებულ კომპანიასთან უკვე გააფორმა. პროექტის შესრულების ვადად კი 6 თვე განისაზღვრა.

უწყების ინფორმაციით, ზუგდიდის კომპლექსის პროექტის სავარაუდო ღირებულება 1 399 812 ლარს შეადგენს. დაგეგმილი ინფრასტრუქტურა გააერთიანებს სპორტული და საზოგადოებრივი დანიშნულების არაერთ სივრცეს. მათ შორის იქნება სავარჯიშო დარბაზები, ღია მინი ფეხბურთის მოედანი, საჭადრაკო სივრცე, ასევე ჩოგბურთისა და პადელის კორტები.

პროექტის მიხედვით, კომპლექსში განთავსდება სხვადასხვა სპორტული სახეობისთვის საჭირო დარბაზები, სავარჯიშო ზონები და დამხმარე სივრცეები, ასევე საკონფერენციო დარბაზი და კომერციული ფართები. ტერიტორიაზე ასევე მოეწყობა თანამედროვე ავტოსადგომი, უსაფრთხოების სისტემები და სრულყოფილი განათების ინფრასტრუქტურა.

სამინისტროს თანახმად, ანალოგიური პროექტი იგეგმება სენაკშიც, სადაც ახალი დახურული საცურაო აუზის პროექტირების შესყიდვის სავარაუდო ღირებულება 1 106 892 ლარს შეადგენს. აუზი ითვალისწინებს არანაკლებ 200 მაყურებელზე გათვლილ ტრიბუნებს, სპორტულ და საბავშვო აუზებს, სავარჯიშო დარბაზებს, გასახდელებსა და ფიზიოთერაპიის სივრცეებს.

უწყების შეფასებით, ორივე პროექტში გათვალისწინებულია სამედიცინო და ადმინისტრაციული ოთახები, საკონფერენციო დარბაზები და კომერციული სივრცეები.

პროექტების განხორციელება მიზნად ისახავს ჯანსაღი ცხოვრების წესის პოპულარიზაციას, ახალგაზრდების სპორტულ აქტივობებში ჩართულობის გაზრდასა და რეგიონის ეკონომიკურ განვითარებას.