მასკი: უკრაინამ Starlink-ის გამოყენების პირობები დაარღვია - უკრაინაბრალდებას უარყოფს

SpaceX-ის დამფუძნებლის, ილონ მასკის განცხადებით, უკრაინის სამხედრო ძალებმა Starlink-ის მომსახურების პირობები დაარღვიეს და სისტემა დრონებით დარტყმებისთვის გამოიყენეს. მასკის მტკიცებით, ხარვეზი, რომელიც ამის შესაძლებლობას იძლეოდა, გასულ კვირას აღმოიფხვრა.

„Starlink-ის, კომერციული დანიშნულების სამოქალაქო სერვისის, ადამიანების მოსაკლავად დრონებით დარტყმების განსახორციელებლად გამოყენება არასოდეს ყოფილა დაშვებული და არც უნდა იყოს“, - წერს მასკი სოციალურ ქსელში.

მისივე განმარტებით, Starshield განსხვავებული სისტემაა, რომელსაც აშშ-ის მთავრობა აკონტროლებს და რომლის გამოყენების შესახებ გადაწყვეტილებას ამერიკული მხარე იღებს.

მასკის განცხადებით, Starlink კრიტიკულად მნიშვნელოვანია უკრაინის თავდაცვისთვის და მისი გათიშვის შემთხვევაში უკრაინის ფრონტის ხაზი დაუყოვნებლივ ჩამოიშლებოდა. მან ასევე აღნიშნა, რომ სისტემამ გადამწყვეტი როლი შეასრულა ომის საწყის ეტაპზე უკრაინის დაცვაში, რადგან რუსეთმა კომუნიკაციის სხვა საშუალებები გაანადგურა ან ჩაახშო.

მასკის ბრალდებებს უკრაინის პრეზიდენტის მრჩეველი თავდაცვის ტექნოლოგიების განვითარების საკითხებში, სერგეი „ფლეშ“ ბესკრესტნოვი გამოეხმაურა. მისი განცხადებით, მასკის განცხადება გაუგებარია, რადგან 2026 წლის ზამთრიდან უკრაინის ტერიტორიაზე, მათ შორის ოკუპირებულ ტერიტორიებზე, Starlink-ის ყველა ტერმინალის სიჩქარე საათში 70-90 კილომეტრამდეა შეზღუდული.

ბესკრესტნოვის თქმით, რუსეთის ტერიტორიაზე Starlink არ მუშაობს, ხოლო უკრაინის შეიარაღებულ ძალებს კომერციული Starlink-ის გამოყენება საშუალო და შორ მანძილზე დარტყმებისთვის ფიზიკურად არ შეუძლიათ.