უკრაინაში Starlink-ის სიჩქარის შეზღუდვები მოიხსნა

უკრაინის სამხედრო უწყებების განცხადებით, სამხედრო ოპერაციებისთვის კრიტიკულად მნიშვნელოვანი თანამგზავრული საკომუნიკაციო სისტემა Starlink-ი თითქმის 11-დღიანი შეზღუდვების შემდეგ ჩვეულ სიჩქარეს დაუბრუნდა. ინფორმაციას Financial Times-ი ავრცელებს.

უკრაინის თავდაცვის მინისტრის, ევგენი ხმარას განცხადებით, უწყების მონიტორინგის სისტემები Starlink-ისა და Starshield-ის სიჩქარის აღდგენას აფიქსირებს. მისივე თქმით, სტაბილური კავშირის პირობებში დრონებს ახლა საათში 400 კილომეტრზე მეტი სიჩქარით ფრენა შეუძლიათ.

უკრაინის პრეზიდენტმა, ვოლოდიმირ ზელენსკიმ დაადასტურა, რომ სიჩქარის შეზღუდვები ღამით მოიხსნა. მისი თქმით, ეს მნიშვნელოვანია ფრონტის ხაზის ლოჯისტიკისთვის და უკრაინის დასაცავად რუსული რეაქტიული დრონების, „შაჰედებისგან“.

გამოცემის ცნობით, შეზღუდვების მოქმედების პერიოდში უკრაინელი სამხედროები კავშირის პრობლემებს საათში 130 კილომეტრზე მეტი სიჩქარით ფრენისას აწყდებოდნენ, ხოლო 160 კილომეტრზე მეტი სიჩქარის დროს სიგნალს სრულად კარგავდნენ. შეზღუდვები განსაკუთრებით მძიმე ტვირთის გადამტან დამრტყმელ დრონებსა და რეაქტიულ უპილოტო აპარატებზე აისახა.

Starlink-ის სიჩქარის შეზღუდვების მოხსნას წინ უძღოდა დავა იმის შესახებ, თუ ვინ დააწესა შეზღუდვები და რა მიზნით. ილონ მასკმა განაცხადა, რომ უკრაინის სამხედრო ძალებმა კომერციული Starlink-ის გამოყენების პირობები დაარღვიეს და სისტემა ადამიანების მოსაკლავად დრონებით დარტყმებისთვის გამოიყენეს. მისი თქმით, ეს ხარვეზი გასულ კვირას აღმოიფხვრა.

უკრაინელი ოფიციალური პირები ამ ბრალდებას უარყოფენ. პრეზიდენტის მრჩევლის, სერგეი ბესკრესტნოვის განცხადებით, უკრაინაში კომერციული Starlink-ის ტერმინალების სიჩქარე საათში 70-90 კილომეტრამდე იყო შეზღუდული, რის გამოც მათი საშუალო და შორ მანძილზე დარტყმებისთვის გამოყენება შეუძლებელი იყო. უკრაინული მხარის განმარტებით, მოძრავ სამხედრო პლატფორმებზე გამოსაყენებელი ტერმინალები სპეციალურ სიაში უნდა ყოფილიყო შეყვანილი და სამხედრო დანიშნულების Starshield-ის სისტემასთან დაკავშირებული.

Starlink-ი უკრაინის სამხედრო კომუნიკაციის ერთ-ერთი უმნიშვნელოვანესი საშუალებაა. უკრაინელი სამხედროები მას იყენებენ როგორც ფრონტის ხაზზე კომუნიკაციისთვის, ისე დრონების მართვისა და რუსული უპილოტო აპარატების წინააღმდეგ თავდაცვისთვის.