ამერიკული ბანკის თანამშრომელმა რომის პაპ ლეო XIV-ს ტელეფონი გაუთიშა, მას შემდეგ, რაც მან უთხრა, რომ რომის პაპია

ამერიკული ბანკის ტექნიკური მხარდაჭერის თანამშრომელმა რომის პაპ ლეო XIV-სთან საუბრისას ყურმილი დაკიდა, როდესაც პონტიფექსმა განუმარტა, რომ ის რომის პაპია. ამ სახალისო ისტორიას The New York Times-ი ილინოისელ მღვდელზე, ტომ მაკკარტიზე დაყრდნობით ავრცელებს, რომელიც პაპთან მრავალი წელია მეგობრობს.

როგორც მაკკარტიმ აღნიშნა, ეს შემთხვევა ლეო XIV-ის ინტრონიზაციიდან დაახლოებით 2 თვეში მოხდა. პაპმა ამერიკულ ბანკში დარეკა, რათა ტელეფონის ნომრისა და მისამართის ცვლილების შესახებ შეეტყობინებინა. მან თავისი სახელი და გვარი - რობერტ პრევოსტი - დაასახელა.

კათოლიკური ეკლესიის ხელმძღვანელმა საკონტროლო კითხვებს სწორად უპასუხა, თუმცა ბანკის თანამშრომელმა განუცხადა, რომ ეს საკმარისი არ იყო და ის პირადად უნდა გამოცხადებულიყო ბანკის განყოფილებაში, აშშ-ში. „ამას ვერ გავაკეთებ. მე ხომ ყველა საკონტროლო კითხვას ვუპასუხე“, - თქვა მან.

პაპი შეეცადა აეხსნა, თუ რატომ ვერ მიდიოდა ბანკში. „ექნებოდა რაიმე მნიშვნელობა, რომ მეთქვა, რომ მე პაპი ლეო ვარ?“ - იკითხა მან. თუმცა ბანკის თანამშრომელმა მას არ დაუჯერა და ყურმილი დაკიდა. რით დასრულდა ეს ყველაფერი და შეძლო თუ არა პაპმა საკონტაქტო მონაცემების დისტანციურად შეცვლა - უცნობია.

ლეო XIV რომის პაპად 2025 წლის მაისში, პაპ ფრანცისკეს გარდაცვალებიდან მალევე აირჩიეს. ის ისტორიაში პირველი პაპი გახდა ამერიკის შეერთებული შტატებიდან.