ანდრეი სიბიგას განცხადებით, მოპარული უკრაინული ხორბლით დატვირთული გემი ისრაელის პორტში აღარ დაიცლება

უკრაინის საგარეო საქმეთა მინისტრმა, ანდრეი სიბიგამ სოციალურ ქსელ X-ში დაწერა, რომ გემი, რომელიც რუსეთის მიერ უკრაინის ოკუპირებული ტერიტორიებიდან მოპარული ხორბლით იყო დატვირთული, ისრაელის პორტში აღარ შევა.

„მისასალმებელია, რომ გემი PANORMITIS-ი, რომელსაც უკრაინის დროებით ოკუპირებული ტერიტორიებიდან ხორბალი უკანონოდ გადაჰქონდა, ისრაელში აღარ დაიცლება. ეს უკრაინის სამართლებრივი და დიპლომატიური ღონისძიებების ეფექტიანობაზე მიუთითებს.

ეს აგრეთვე მკაფიო გზავნილია ყველა სხვა გემის, კაპიტნის, ოპერატორის, დაზღვევის აგენტისა და მთავრობისთვის: არ იყიდოთ მოპარული უკრაინული ხორბალი. აღნიშნულ დანაშაულში მონაწილეობას ნუ მიიღებთ.

ვაგრძელებთ ამ კონკრეტული გემის თვალყურის დევნებას და მასთან განხორციელებული ნებისმიერი ოპერაციის საფრთხის შესახებ ყველას ვაფრთხილებთ.

ჩვენ აგრეთვე გავაგრძელებთ რუსული მარცვლეულის ჩრდილოვანი ფლოტის წინააღმდეგ სასანქციო ზომების გაზრდას“, - დაწერა სიბიგამ.

ცნობისთვის, 27 აპრილს უკრაინის საგარეო საქმეთა მინისტრმა, ანდრეი სიბიგამ განაცხადა, რომ ისრაელის პორტში შესასვლელად ემზადება გემი, რომელიც რუსეთის მიერ უკრაინის ოკუპირებული ტერიტორიებიდან მოპარული მარცვლეულით არის დატვირთული. სიბიგას მისმა ისრაელელმა კოლეგამ, გიდეონ საარმა უპასუხა და აღნიშნა, რომ უკრაინულ მხარეს აღნიშნული ბრალის დამადასტურებელი მტკიცებულებები არ წარუდგენია.

This is a welcome development that the “PANORMITIS” vessel, which is illegally transporting grain from Ukraine’s temporarily occupied territories, will not be unloading in Israel. This demonstrates that Ukraine’s legal and diplomatic actions have been effective. This is also a… — Andrii Sybiha 🇺🇦 (@andrii_sybiha) April 30, 2026