ჭეიშვილი: გვახსოვს ისტერიკა, რომელიც ჩვენი მხრიდან ე.წ. პოლიტიკური ძალების მიმართ კონსტიტუციური სარჩელის მომზადებას მოჰყვა - გერმანიაში ძალიან საეჭვო წინაპირობების გათვალისწინებით, სახელისუფლებო გუნდი ცდილობს, რომ ოპონენტი ჩამოიშოროს რეგიონულ არჩევნებში. ამაზე უფრო კლასიკური მაგალითი ორმაგი სტანდარტისა, რა შეიძლება იყოს?

გვახსოვს, მათ შორის ბრიუსელის მხრიდან ის ერთგვარი ისტერიკა, რომელიც მოჰყვა ჩვენი მხრიდან რადიკალური, ე.წ. პოლიტიკური ძალების მიმართ შესაბამისი კონსტიტუციური სარჩელის მომზადებას, რომელიც დაეყრდნო ძალიან მკაფიო და მყარ მტკიცებულებებს, - განაცხადა იურიდიულ საკითხთა საპარლამენტო კომიტეტის თავმჯდომარის პირველმა მოადგილემ თორნიკე ჭეიშვილმა.

დეპუტატი გამოეხმაურა ინფორმაციას, რომლის თანახმად, გერმანიაში საქსონია-ანჰალტის მიწაზე დაგეგმილ მნიშვნელოვან არჩევნებამდე ერთი კვირით ადრე, ქვეყნის თავდაცვის მინისტრმა მემარჯვენე პარტიის - „ალტერნატივა გერმანიისთვის“ ზოგიერთი განყოფილების აკრძალვა მოითხოვა.

„გერმანიაში ძალიან საეჭვო ფონზე და საეჭვო წინაპირობების გათვალისწინებით, სახელისუფლებო გუნდი ცდილობს, რომ ოპონენტი, პოლიტიკური ძალა ჩამოიშოროს შესაბამის რეგიონულ არჩევნებში. ამაზე უფრო კლასიკური ქრესტომათიული მაგალითი ორმაგი სტანდარტისა, რა შეიძლება იყოს?“, - აღნიშნა ჭეიშვილმა.

გერმანიის თავდაცვის მინისტრი ბორის პისტორიუსი ქვეყნის მემარჯვენე-პოპულისტური პარტიის, „ალტერნატივა გერმანიისთვის“ (AfD) აკრძალვის მოწოდებით გამოვიდა.