დამოუკიდებლობის დღისადმი მიძღვნილი საზეიმო ღონისძიებებისთვის მზადება აჭარის რეგიონში მასშტაბური აქტივობებით გრძელდება
დამოუკიდებლობის დღისადმი მიძღვნილი საზეიმო ღონისძიებებისთვის მზადება აჭარის რეგიონში მასშტაბური აქტივობებით გრძელდება. 17:10 საათზე საქართველოს ყველა დიდი ქალაქის მსგავსად ექვსივე მუნიციპალიტეტში საზეიმოდ შესრულდება საქართველოს სახელმწიფო ჰიმნი და გაიმართება საზეიმო ღონისძიებები.
ბათუმში მასშტაბური სახალხო დღესასწაულის მთავარ ლოკაცია ანბანის კოშკის მიმდებარე ტერიტორია იქნება. მთელი დღის განმავლობაში მოწყობილი იქნება შემეცნებითი და სპორტული კუთხეები. ასევე, ადგილობრივი მეწარმეებისა და ხელოვანების ნამუშევრების გამოფენა-გაყიდვა გაიმართება.
ქობულეთის მუნიციპალიტეტში დაგეგმილია ქვეყნის ტერიტორიული მთლიანობისთვის დაღუპულ გმირთა მემორიალის ყვავილებით შემკობა. ცენტრალური პარკი სხვადასხვა კულტურული და საბავშვო აქტივობებით უმასპინძლებს სტუმრებს.
ხულოში დღესასწაული სახალხო მსვლელობით გაიხსნება. გაიმართება სპორტული შეჯიბრებები, მოეწყობა გამოფენა-გაყიდვები. სპორტული, საბავშვო და გასართობი ღონისძიებები.
გამოფენა-გაყიდვები გაიმართება შუახევში, ქედასა და ხელვაჩაურშიც. სადღესასწაულო ღონისძიებები დღის ბოლოს ექვსივე მუნიციპალიტეტში გალა-კონცერტებით დასრულდება.
იმედი
წყარო: imedinews.ge