გიორგი ახვლედიანი: გარე ძალებისთვის „იმედი“, „პოს ტვ“, „რუსთავი 2“ გახდნენ ძალიან დიდი პრობლემა, ამ ტელევიზიებმა საზოგადოების განწყობების ფორმირება სწორი მიმართულებებით მოახერხეს - გაცილებით მეტი ნდობა, მხარდაჭერა, მაყურებელი მოიპოვეს

გარე ძალებს საქართველოს ვასალიზაცია უნდათ. სჭირდებათ საქართველო, როგორც ყურმოჭრილი მონა, რომელიც გამოიყენება კონკრეტული პროვოკაციებისთვის, იქნება ეს რეგიონში შექმნილი ვითარებიდან გამომდინარე, „პროქსი“ ომებისთვის, რომლის უამრავ მაგალითს ვხედავთ, თუ ასევე სხვა შემთხვევებისთვის- განაცხადა „EURO ანატომიაში“ მედიაპოლიტიკის ექსპერტმა, გიორგი ახვლედიანმა.

მან ასევე აღნიშნა, რომ მთლიანად ქართულ პოლიტიკურ სპექტრში ერთგვარი დებატებისა და კამათის ფორმატი მედიასაშუალებებით მიმდინარეობს, ამდენად, პირველი დარტყმის ობიექტი ტელევიზია ხდება.

„თავისუფალი სიტყვა არის უმნიშვნელოვანესი კონტექსტი. დღეს ჩვენს ქვეყანაში, გამომდინარე ჩვენი რადიკალური ოპოზიციის სრულიად არაადეკვატური ქმედებებიდან, პოლიტიკური პროცესი მთლიანად მედიაში გადავიდა. ოპოზიციამ დატოვა პარლამენტი, უარი თქვა ყველანაირ საპარლამენტო პროცესზე, ანუ დებატების ფორმატშიც კი არ მოდიან „ნაციონალები“ და ეს რადიკალური ფრთა. შესაბამისად, მთლიანად ქართულ პოლიტიკურ სპექტრში ერთგვარი დებატებისა და კამათის ფორმატი მედიასაშუალებებით მიმდინარეობს. მაგრამ, წარმოიდგინეთ ამ მედიასაშუალებებიდან არიან გამოკვეთილი ლიდერები, რომლებიც საზოგადოებას რომ უხსნიან არსებულ რეალობას, გაცილებით დამაჯერებლად გამოიყურებიან. ასეთია „იმედი“, „პოს ტვ“, „რუსთავი 2“. შესაბამისად, ისინი გახდნენ ძალიან დიდი პრობლემა. თავად ტელევიზიები კი არ არის პრობლემა, არამედ ის, რომ ამ ტელევიზიებმა საზოგადოების განწყობების ფორმირება სწორი მიმართულებებით მოახერხეს - გაცილებით მეტი ნდობა, მხარდაჭერა, მაყურებელი მოიპოვეს. ეს გახდა პრობლემა.

ტელევიზიების მეშვეობით, ბუნებრივია, საქართველოს ვასალიზაციის მსურველი ძალები ამ შემთხვევაში ებრძვიან ხელისუფლებას. აქედან გამომდინარე, კიდევ ერთხელ ვამბობ, მთელი ეს პოლიტიკური დაპირისპირება მედია-სივრცეშია გადასული, პირველი დარტყმის ობიექტი ხდება ტელევიზია“, - განაცხადა ახვლედიანმა.