მიხეილ ყაველაშვილი: გერმანიაში საქართველოს ელჩის დამტკიცების თემაც როგორი სირცხვილი იქნება მომავალში, ვინმე ნორმალური თუ მოვა გერმანიის ხელისუფლებაში და იმედი მაქვს გაიაზრებს დღევანდელ სიტუაციას, თუ როგორ იქცეოდა გერმანიის ელჩი საქართველოში

ეს თემაც როგორი სირცხვილი იქნება მომავალში, ვინმე ნორმალური თუ მოვა [გერმანიის ხელისუფლებაში] და იმედი მაქვს გაიაზრებს დღევანდელ სიტუაციას, თუ როგორ იქცეოდა არსებული ელჩი და ეს დამოკიდებულება ქვეყანასთან [საქართველოსთან] მიმართებაში, - განაცხადა საქართველოს პრეზიდენტმა მიხეილ ყაველაშვილმა გერმანიის ელჩთან პეტერ ფიშერთან დაკავშირებით გადაცემაში „იმედი LIVE“.

წამყვანმა ჰკითხა, რა არის ის ხაზები, რომლის გადაკვეთასაც საქართველოს ხელისუფლება არ მოითმენს და ამის იქით დიალოგი შეუძლებელია.

„დღეს მოხდა ჩვენი ელჩის აღიარება გერმანიაში, ამდენი თვის შემდეგ. ყველა ქვეყანაში არსებობს ამა თუ იმ ქვეყნის საელჩო და ელჩი. მეც მიწევს უამრავი ელჩის მიღება და დადასტურება, რომ ისინი წარმოადგენენ მათ ქვეყნებს. ელემენტარული რეგლამენტის თემაა. ეს თემაც როგორი სირცხვილი იქნება, მომავალში ვინმე ნორმალური თუ მოვა [გერმანიის ხელისუფლებაში] და იმედი მაქვს გაიაზრებს დღევანდელ სიტუაციას, თუ როგორ იქცეოდა არსებული ელჩი და ეს დამოკიდებულება ქვეყანასთან [საქართველოსთან] მიმართებაში სამარცხვინო იყო. ვერავის მივცემთ პრივილეგიას, რომ ვინმე წამყვანი ევროპელი ქვეყნის წარმომადგენელია და დამამცირებელია ვინმე სხვა ქვეყნის წარმომადგენელი. სამართლიანი დამოკიდებულება გვჭირდება, ჩვენ ასე არ ვყოფთ. თუ ვინმე არასწორად და შეურაცხმყოფლად იქცევა, იმას ვამხელთ. ხომ დავინახეთ, რომ გვიან, მაგრამ ეს პროცესი შეიცვალა. ასეთივე იმედით ვუყურებთ ამ პროცესს [ევროკავშირთან ურთიერთობების გაუმჯობესებას], რომ შეიცვლება. ჩვენ მზად ვართ ნებისმიერ დროს გავაგრძელოთ დიალოგი“, - აღნიშნა ყაველაშვილმა.

ალექსანდრე კარტოზიამ დღეს გერმანიის ფედერალურ პრეზიდენტს, ფრანკ-ვალტერ შტაინმაიერს პრეზიდენტს რწმუნებათა სიგელები გადასცა.