POLITICO: რუსეთი დიზელის ექსპორტს წყვეტს და საწვავის იმპორტს იწყებს

რუსეთი ივლისის ბოლომდე დიზელის ექსპორტს აჩერებს, რათა ენერგეტიკული ბაზარი უკრაინასთან ომის გავლენისგან დაიცვას. ინფორმაციას POLITICO ავრცელებს.

გამოცემის ცნობით, გადაწყვეტილება მას შემდეგ მიიღეს, რაც რუსეთის ტერიტორიაზე დრონებით განხორციელებულმა თავდასხმების სერიამ ქვეყანაში საწვავის შიდა მარაგებზე ზეწოლა გაზარდა.

ექსპორტის შეზღუდვამ, შესაძლოა, ევროპაში დიზელის ფასებზე გავლენა მოახდინოს, რაც გაზრდის ხარჯებს ფერმერებისთვის, გადამზიდავებისთვის და საბოლოოდ მომხმარებლებისთვის.

რუსეთის პრეზიდენტის ვლადიმერ პუტინის ხელმძღვანელობით გამართულ მთავრობის სხდომაზე ვიცე-პრემიერმა ალექსანდრ ნოვაკმა განაცხადა, რომ რუსეთმა „დღეს შემოიღო დიზელის საწვავის ექსპორტის აკრძალვა“, რათა „შიდა ბაზარზე მიწოდება გაზარდოს“. მისი თქმით, რუსეთი ივლისში ნავთობპროდუქტების იმპორტს დაიწყებს და წარმოებას გაზრდის დაბალი ეკოლოგიური სტანდარტის მქონე საწვავის გამოყენებით, რაც შიდა დეფიციტის შემცირებისკენ მიმართული ღონისძიებების ნაწილია.

შეზღუდვები ძალაში 31 ივლისის ჩათვლით დარჩება.