პრეზიდენტი: მთელი ჩვენი ისტორია ამას გვკარნახობს, არ არსებობს პერიოდი, როცა იყო შესაძლებლობა, რომ საქართველოს დამოუკიდებლად ეარსება და ეს შანსი არ გამოეყენებინა ჩვენს წინაპარს
მთელი ჩვენი ისტორია ამას გვკარნახობს, არ არსებობს პერიოდი, როცა იყო შესაძლებლობა, რომ საქართველოს დამოუკიდებლად ეარსება, საკუთარი პოლიტიკა განეხორციელებინა და ეს შანსი არ გამოეყენებინა ჩვენს წინაპარს, - განაცხადა გადაცემაში „იმედი Live” საქართველოს პრეზიდენტმა მიხეილ ყაველაშვილმა.
პრეზიდენტის თქმით, ხელისუფლება არ მალავს, რომ ამ დრომდე იყო ბევრი სხვადასხვა მიზეზი, რის გამოც ქვეყანა დამოუკიდებელი პოლიტიკის წარმოებას ვერ ახერხებდა.
„თეორიული თვალსაზრისით შეგვიძლია მსჯელობა, რომ ერთი ქვეყნის საფარქვეშ იყოს ქვეყანა და მისი კარნახით ცხოვრობდეს, ჩვენ ხომ ეს გამოვიარეთ? ეს გამოცდილება დავაგროვეთ. ჩვენ სამი ომი გადავიტანეთ, ჩვენ მარტონი დავრჩით მტერთან სხვადასხვა დროს. მთელი ჩვენი ისტორია ამას გვკარნახობს, არ არსებობს პერიოდი, როცა იყო შესაძლებლობა, რომ საქართველოს დამოუკიდებლად ეარსება, საკუთარი პოლიტიკა განეხორციელებინა და ეს შანსი არ გამოეყენებინა ჩვენს წინაპარს. სწორედ აქედან გამომდინარე ჩვენ დავინახეთ შესაძლებლობა, ხომ არ ვმალავთ, რომ თუნდაც „ქართული ოცნების“ მმართველობის დროს იყო ბევრი ისეთი საკითხი, როდესაც ჩვენ ვერ ვახერხებდით დამოუკიდებელი პოლიტიკის წარმოებას, სხვადასხვა მიზეზებით. ჩვენ გუნდშიც გვყავდა გარე აქტორების მხარდაჭერილი პოლიტიკოსები და ხშირ შემთხვევაში გვიწევდა რაღაცების სხვანაირად გადათამაშება, თუმცა ეს პროცესები წარსულს ჩაბარდა“, - განაცხადა მიხეილ ყაველაშვილმა.
პრეზიდენტის თქმით, საქართველომ უფრო მეტად დამოუკიდებელი პოლიტიკის წარმოება ქვეყანაზე განხორციელებული ზეწოლის შემდეგ დაიწყო.
„როცა უკრაინაში ომი დაიწყო, მაშინ მოხდა ზეწოლა და იქ მოხდა ჩვენი მომზადებული პოზიციების გაჟღერება. იმ დღიდან დაიწყო ჩვენი უფრო მეტად დამოუკიდებელი პოლიტიკის წარმოება. გარდა იმისა, რომ ამ პოლიტიკამ ჩვენ მოგვიტანა მშვიდობა და სტაბილურობა, ასევე განვითარებისკენ დიდი ნაბიჯები გადავდგით“, - განაცხადა საქართველოს პრეზიდენტმა.
