შალვა პაპუაშვილი: ევროპარლამენტი და ევროსაბჭოს საპარლამენტო ასამბლეა ერთმანეთისგან არსებითად აღარ განსხვავდებიან - ორივე ეს ინსტიტუცია იმართება ერთი პოლიტიკური ცენტრიდან, რომელსაც თავისი მავნე გეგმები აქვს საქართველოსთან მიმართებით

მე მგონი, ყველასთვის ცხადია, რომ ევროპარლამენტი და ევროსაბჭოს საპარლამენტო ასამბლეა ერთმანეთისგან არსებითად აღარ განსხვავდებიან. ეს არის ერთი და იგივე პოლიტიკური ჯგუფი, რომელიც მართავს ამ ორივე ინსტიტუციას და აქცევს იარაღად ქართველი ხალხის წინააღმდეგ საკუთარი პოლიტიკური დღის წესრიგის გასატარებლად, - განაცხადა საქართველოს პარლამენტის თავმჯდომარემ შალვა პაპუაშვილმა მედიასთან.

მან აღნიშნა, რომ ევროსაბჭოს საპარლამენტო ასამბლეამ დაარღვია სუვერენიტეტის პრინციპი და ასამბლეაში ქართული დელეგაცია სწორედ ამიტომ აღარ მონაწილეობს.

„ორივე ინსტიტუციაში წამყვან ჯგუფს წარმოადგენს ევროპული სახალხო პარტია და სხვა ასეთი ჯგუფები და ორივე ეს ინსტიტუცია იმართება ერთი პოლიტიკური ცენტრიდან, რომელსაც თავისი მავნე გეგმები აქვს საქართველოსთან მიმართებით. ამიტომაც არის, რომ ფაქტობრივად ეს არის ერთმანეთისგან გადაწერილი ტექსტები. იქმნება შთაბეჭდილება, რომ მომხსენებლები რაღაც ერთ „ჩატში“ არიან და მათ უზიარებენ და უგდებენ ტექსტებს, რომლებიც შემდეგ უნდა გაჟღერდეს სხვადასხვა რეზოლუციით თუ ტექსტით.

ევროსაბჭოს საპარლამენტო ასამბლეამ დაირღვა საერთაშორისო სამართლის ფუნდამენტური პრინციპი - სუვერენიტეტი, რომ ხალხმა თავად გადაწყვიტოს, ვინ იყოს მათი ხელისუფალი, ამას PACE დღემდე არღვევს, ჩვენი დელეგაცია ამიტომაც არ მონაწილეობს“, - განაცხადა პარლამენტის თავმჯდომარემ.

მან ევროპარლამენტის ბოლო რეზოლუციის შესახებაც ისაუბრა.

„შინაარსთან დაკავშირებით ხაზგასასმელია ერი რამ - რომ ევროპარლამენტის ბოლო რეზოლუცია არის ევროპული ინსტიტუტის პირველი ოფიციალური ტექსტი, სადაც მოხდა ღია თავდასხმა საქართველოს მართლმადიდებელ ეკლესიაზე. ვფიქრობ, სხვა შემთხვევებიც რომ გავიხსენოთ, ევროპარლამენტს ასეთ დროს ყველაზე უხეშ, ყველაზე ანტიქართულ ნაბიჯებს ადგმევინებენ ხოლმე, ამ შემთხვევაშიც მოასინჯვინეს ნიადაგი საქართველოს ეკლესიაზე სამომავლო თავდასხმებისთვის. თუკი აქამდე ეს თავდასხმები იყო ინდივიდუალური ხასიათის - გახსოვთ გერმანელი პოლიტიკოსი, ბუნდესტაგის საგარეო კომიტეტის თავმჯდომარე მიხაილ როთი, რომელიც თავს დაესხა ქართულ ეკლესიას. გახსოვთ სხვათა მსგავსი, ინდივიდუალური განცხადებები. დღეს ჩანს, რომ გადადიან ქართულ ეკლესიაზე თავდასხმის უკვე შემდეგ ეტაპზე და ევროპარლამენტს, როგორც ყველაზე მოძულებულ ინსტიტუციას, მოასინჯვინეს ნიადაგი.

ამიტომ ევროკომისია, ევროკავშირის ელჩი საქართველოში აქვე გაემიჯნოს მსგავს თავდასხმას. აქ პილატესავით ხელს ვერავინ დაიბანს ქართველი ხალხისა და ქართული ეკლესიის წინააღმდეგ ამ უმსგავსო ქცევაში. საქართველოს ეკლესიაზე ევროპარლამენტის მხრიდან თავდასხმისგან არგამიჯვნა ნიშნავს მასზე დათანხმებას და სწორედ ასე განვიხილავთ სამომავლოდ ამგვარ მიდგომებს“, - განაცხადა შალვა პაპუაშვილმა.